Nov 15, 2022

حكومەتی هەرێمی كوردستان بڕیاریدا قەرەبووی ئەم هاوڵاتیانە بكاتەوە


حكومەتی هەرێمی كوردستان ڕەزامەندی نیشاندا لەسەر قەرەبووكردنەوەی سوودمەندانی گوندی كۆری بەتاپۆكردنی زەوییەكانیان.

بڕیارەكەی حكومەتی هەرێمی كوردستان لەسەر پێشنیارێكی وەزارەتی شارەوانی دێت كە تیایدا ئاماژە بەوەكراوە:" پێویستە سوودمەندان لە هەمان شوێنی خۆیان كە پێشتر بۆیان دیاری كرابوو، قەرەبوو بكرێنەوە، هەروەها لە هەموو باج و ڕسووماتێك ببەخشرێن كە لە نەخشەی گەزنە پارچە زەوییەكەیان بەناو كراوە، بەرانبەر دەستبەرداربوونیان لەو پارچە زەوییانە و بەناوكردنی پارچە زەوی تر لەو بەشەی پرۆژەی گوندی كۆری، لەبەر ئەوەی بابەتەكە لە بەرژەوەندیی گشتی و كەسانی كەمدەرامەتە"، مەسروور بارزانی سەرۆكی حكوومەتی هەرێمی كوردستانیش ڕەزامەندیدا لەسەر جێبەجێكردنی ئەو پێشنیازە.
 
وەزارەتی شارەوانی بە نووسراوی ژمارە (449) لە ڕێكەوتی 11/10/2022 بۆ سەرۆكایەتیی دیوانی لە ئەنجوومەنی وەزیران بەرزكرایەوە كە لە هەمان سنووری خۆیان سودمەندانی گوندی كۆری قەرەبوو بكرێنەوە، لەڕێكەوتی 7/11/2022 ئاماژە بەوەكرا كەسەرۆكی حكومەتی هەرێم ڕەزامەندی خۆی دەربڕێوە لەسەر ئەو قەرەبووكردنەوەیە.