Jun 18, 2022

ئاگر لە باڵەخانەیەكی نیشتەجێبوون لەهەولێر كەوتەوە


بەهۆكارێكی نەزانراو، ئاگر لە باڵەخانەیەكی نیشتەجێبوون لە شاری هەولێر كەوتەوەو بەپێی ئامارە سەرەتاییەكانیش، كچێكی خەڵكی رۆژئاوای كوردستان بەهۆی ئاگرەكە گیانی لەدەستداوە.

ئاگرەكە ئێوارەی ئەمڕۆ شەممە لە نهۆمی 17ی باڵەخانەیەكی كۆمەڵگەی نیشتەجێبوونی (ئێم ئاڕ ئێف) كەوتووە، تیمەكانی بەرگری شارستانی هەولێر بەمەبەستی بەهاناوەچوونی دانیشتوانی باڵەخانەكە، گەیشتوونەتە شوێنی رووداوەكەو سەرقاڵی كۆنترۆڵكردنی ئاگرەكەن.

نەبەز حەمید، قائیمقامی قەزای ناوەندی هەولێر، لەشوێنی رووداوەكەوە رایگەیاند، تیمەكانی بەرگری شارستانی توانیویانە ئاگرەكە كۆنترۆڵ بكەن و لەئێستادا سەرقاڵی گواستنەوەی دانیشتوانی باڵەخانەكەن بۆ نەخۆشخانە، كە بەشێكیان بەهۆی كاریگەری دووكەڵی ئاگرەكە، تووشی تەنگەنەفەسی بوون.

وتیشی:" تائێستا هۆكاری كەوتنەوەی ئاگرەكە نەزانراوەو لێكۆڵینەوە لەوبارەیەوە بەردەوامە".