Jun 17, 2022

پەروەردە پەیامێكی گرنگ ئاراستەی خوێندكارانی 12ی ئامادەیی دەكات


لیژنەی باڵای ئەزموونە گشتییەكانی پۆلی 12 ئامادەیی لە وەزارەتی پەروەردە، شوێن و هۆڵی تاقیكردنەوەكانی پۆلی 12 ئامادەیی بەهەموو بەشەكانییەوە ئاشكرا دەكات و بەستەرێكیش بڵاودەكاتەوە بۆئەوەی خوێندكاران لەو رێگەیەوە هۆڵی تاقیكردنەوەكانیان بزانن.

لیژنەكە لە ئاگادارییەكی گرنگدا، بڵاویكردووەتەوە، هەموو ئەو قوتابی و خوێندكارانەی كە مافی بەشداربوونیان بەدەستهێناوە لە تاقیكردنەوە گشتییەكانی پۆلی (١٢)ی ئامادەیی بۆ ساڵی خوێندنی ٢٠٢١ -٢٠٢٢ خولی یەكەم ( بەهەموو بەشەكانییەوە) دەتوانن لە رێگەی ئەو لینكەی خوارەوە، ناو و هۆڵی ئەزموونی خۆیان بناسن و بزانن لە چ قوتابخانەو خوێندنگەو زانكۆیەك تاقیكردنەوە ئەنجام دەدەن.

لیژنەی باڵای ئەزموونە گشتییەكان راشیگەیاندووە، پێویستە خوێندكاران دڵنیاببنەوە لە ناوی چواری و زمانی خوێندنیان و دروستی كۆدی ئەزموونەكانیان و تەواوی داتا ئاماژەپێكراوەكان. پرسیارەكان بەگوێرەی ئایین و زمانی خوێندنیان دیاریكراوە، لەكاتی بوونی هەر هەڵەیەك تا رێكەوتی ٢١ی ٦ی ٢٠٢٢ پێویستە سەردانی قوتابخانە و پەروەردەی قەزای خۆیان بكەن بۆ راستكردنەوەی هەر هەڵەیەك ئەگەر هەبێت. لێژنەی باڵای ئەزموونە گشتییەكان بەرپرسیار نابێت لەبوونی هەر هەڵەیەك لەدوای رێكەوتی ئاماژەپێكراو.