Mar 10, 2022

كوڕانی ئەنچیلۆتی رێمۆنتادایان تۆماركردو پاریس سانجێرمانیان راماڵی


كوڕانی ئەنچیلۆتی بەڕابەرایەتی كەریم بنزیمە-ی ئەستێرەی یانەكە، لەشەوێكی ئاگریندا ریمۆنتادایان بەسەر یانەی پاریس سانجێرماندا تۆماركردو مێژوویەكی بیرنەكراویان نووسیەوە.

لەچوارچێوەی یاریەكانی گەڕی 16ی خولی یانە پاڵەوانەكان، شەوی رابردوو یانەی ریال مەدریدی ئیسپانی لەیاریگای سانتیاگۆ بێرنابیۆ رووبەڕووی یانەی پارێس سانجێرمان بوەوە، وەك چاوەڕێ دەكرا یاریەكە بۆ كوڕانی شاهانە ئاسان نەبوو بەتایبەت كەلەیاری چووندا بەگۆڵێكی بێ بەرامبەر بەرامبەر یانە فەڕەنسییەكە شكستی هێنابوو.

گێمی یەكەمی یاریەكە بە فشاری كوڕانی كارۆلۆ ئەنچیلۆتی دەستیپێكرد، بەڵام هیچ مەترسییەكیان بۆسەر تۆڕی یانەی میوان دروست نەكرد بەڵكو بەپێچەوانەوە یانە فەڕەنسییەكە مەترسیدارتر بوون بۆسەر گۆڵی كۆرتوا، تا لەخولەكی 39ی گێمەكەدا كیلیان ئێمباپێ‌ گۆڵێكی تۆماركردو ئەركی یانەی شاهانەی قورستركرد.

گێمی دووەمی یاریەكە بەهەمان شێوازی گێمی یەكەم دەستیپێكردو یاریزانانی  ریال فشاریان دەكرد تالەخولەكی 60ی یاریەكەدا كەریم بنزیمە گۆڵی یەكسانبوونی بۆ ریالییەكان تۆماركردو گوڕو تینێكی زیاتری بەیاریەكە بەخشی، بەجۆرێك لە خولەكەكانی 76 و 78ی یاریەكەدا هەمان یاریزان گۆڵی دووەم و سێیەمی خۆی لەیاریەكەدا تۆماركرد و یانەی شاهانە توانی لەماوەی 16 خولەكدا ریمۆنتادا تۆمار بكات و مێزەكە بەسەر لیۆنێل مێسی و هاوڕێكانیدا قڵب بكاتەوەو لەخەونی گەیشتن بەقۆناغی هەشت بێبەشیان بكات.