وەزارەتی سامانە سروشتییەكان رایدەگەیەنێت، پاش ئەوەی مۆڵەتی هاوردەكردنی بەنزین درایە بازرگانان، نرخی هەر لیترێكی بەنزین 40-50 دینار دابەزیوە و چاوەڕوانیی دابەزینی زیاتر دەكرێت.

وەزارەتەكە لە راگەیەندراوێكدا بڵاویكردەوە، دوای ئەوەی كەمال محەمەد ساڵح، وەزیری سامانە سروشتییەكان رۆژی پێنجی ئەم مانگە لە فەرمانێكی وەزاریدا ڕێگەپێدانی بۆ هاوردەكردنی بەنزینی بازرگانی لە بازگەكانی نێوان حكومەتی هەرێم و حكومەتی فیدراڵ دەركرد و ڕۆژانە ئەو بەنزینەی دێت ڕوو لە زیادبوونە، بۆیە چاوەڕوانیی دابەزینی زیاتری نرخەكان دەكرێت.

وەزارەتی سامانە سروشتییەكان ئاماژی بەوەشكردووە، ئامانج لە پێدانی مۆڵەتی هاوردەكردنی بەنزین، بۆ زیادكردنی خستنەڕووی لە بازاڕەكانی هەرێم و كەمكردنەوەی نرخەكەیەتی، هاوردەكردنیشی پێویستە بەپێی ئەو كوالێتییە بێت كە لەلایەن لیژنەكانی بەڕێوەبەرایەتیی نەوت و كانزاكان و پارێزگاكانەوە دیاریكراوە.