ئەو شۆفێرانەی تابلۆی دوای ئۆتۆمبێلەکانیان لێدەکەنەوە بۆئەوەی لە کامێرای تیژڕەوی تۆمار نەکرێن، سزایان بۆ دانراوە و دەست بەسەر ئۆتۆمبێلەکانیاندا دەگیرێت.

بەڕێوەبەرایەتی هاتوچۆی هەولێر بڵاویکردەوە، هەندێک حاڵەت پەیدا بووە کە شوفێر تابلۆی دواوە لێ دەکەنەوە بۆ ئەوەی لە کامێرای تیژڕەوی تۆمار نەکرێن. هاووڵاتیانیش وێنەیان بۆمان دەگرن و ئێمەش رێوشوێنی یاسایی توندیان لەبەرامبەر دەگرینە بەر.

بەڕێوەبەرایەتییەکە ئاماژە بەوە دەکات، هەر شوفێرێک بەو حاڵەتەوە بگیرێت، دەست بەسەر ئۆتۆمبێلەکەیدا دەگیرێت و سزایەکی دارایی توند دەکرێت.

دەشڵێت، خۆتان لەو جۆرە سەرپێچییە بەدوور بگرن چونکە ئەگەر نەکەونە بەر چاوی ئەفسەر و کارمەندانی هاتوچۆ، هەزاران هاووڵاتی بەرپرس و هاوکار هەن کە وێنە و ڤیدیۆتان دەگرن و بۆ هاتوچۆ رەوانەیان دەکەن.