Jan 18, 2023

وەزیری ناوخۆ گیانی لەدەستدا


لەئاكامی كەوتنەخوارەوەی هێلیكۆپتەرێكی سەربازی لە نزیك شاری كییێڤ لە ئۆكراینا، دێنیس مۆناستیریسكی، وەزیری ناوخۆی ئەو وڵاتەو 16ی تر گیانیان لەدەستدا.

ئۆلیسكی كۆلیبا، حاكمی ناوچەی كیێڤ رایگەیاندووە، هێلیكۆپتەرەكە لەنزیك باخچەیەكی منداڵان و ناوچەیەكی نیشتەجێبوون لەشارۆچكەی پرۆڤاری كەوتووەتە خوارەوە و بەهۆیەوە جگە لەوەزیری ناوخۆ 16 كەسی تر گیانیان لەدەستداوە كە دوانیان منداڵن.

تائێستا هۆكاری ڕووداوەكە ئاشكرا نەكراوەو بەرپرسانی ئۆكراینا ئاماژەیان بەوەنەكردووە كە كەوتنە خوارەوەی هێلیكۆپتەری وەزیری ناوخۆی ئەو وڵاتە لەئاكامی هێرشی سوپای رووسیا بووبێت.

بەگوێرەی ئەو تۆمارە ڤیدۆییانەی دوای ڕووداوەكە بڵاوكراونەتەوە، باڵەخانەیەك دەبینرێت كەبەهۆی ڕووداوەكە ئاگری گرتووەو خەڵكانێكیش كەلەنزیك ڕووداوەكەن هاوار دەكەن و دەقیژێنن.