Jul 24, 2022

هێرشەکانی تورکیا لەدوای سەردانەکەی تاران؟!


#تورکیا بەبێ مەبەست تۆپبارانی شوێنە گەشتیاریەکانی نەکردوە، بەتایبەت لەدوای ئەوەی وەڵامی ئەرێنی وەرنەگرتەوە لەلایەن ڕووسیاو ئێرانەوە بۆ پرسی سوریا، بۆیە مەنتیقی نیە بڵێین تۆپباران و لەشکرکێشی بەو ڕوونیە بێ مەبەستە یان هەڵەی سەربازیە،
#هێشتا ئامانجە سەرەکیەکە ڕوون نەبوەتەوە و تورکیاش بەردەوامە لە هەنگاوە سەربازیەکانی و هیچ هەڕەشەیەکی عێراق ڕاینەگرتوە، ڕوونتر بڵێم عێراق وڵاتی پاراستنی سەروەری نیە
#ڕەنگە تورکیا چاوەڕێی هەڵوێستێکی نەرمتری لە ئێران کردبێت و لە ئێستاشدا دەیەوێت بزانێت لە ئەگەری گرژی زیاتردا ئێران و ڕووسیا چ هەڵوێستێکیان دەبێت، ئەگەرنا هیچ هەنگاوێکی عێراق ناتوانێ تورکیا ڕاگرێت ئەگەر پشتیوانی ئێرانی لەگەڵ نەبێ
#عێراقی ئێستا لە هیچ ڕوویەکەوە بەراورد ناکرێت بە تورکیاو ناشتوانێ هیچ هەنگاوێکی تورکیا ڕاگرێت، بەتایبەت عێراقێکی پڕلە ململانێی نێوخۆیی و مەیدانی تەسفیە حساباتی وڵاتان، عێراقێك کە بەرپرسەکانی لەخەمی زیادکردنی سەرمایەکەیاندابن ناتوانن ببنە بەرگریکاری خاک و پارێزەری سەروەری
#لێرەدا پرسیارەکە ئەوەیە کە ئایا داگیرساندنی گڵۆپی سور بەرامبەر تورکیا لە پرسی سوریادا، ئاماژەیەک نیە بۆ هەڵکردنی گڵۆپی سەوز لە خاکی عێراق؟ ئەی ناکرێت بڵێین جۆرێکە لە گۆڕانکاری لە هاوکێشەکەدا، بە گۆڕینەوەی ناوچەکانی ململانێ؟
#هیوادارم هەڵەبم، بەڵام پێموایە دروستبوونی هەر گرژیەك لە نێوان عێراق و تورکیا ڕوو بدات، بەزیان بۆ کورد دەشکێتەوە، چونکە ڕوونە کە کوێ دەبێتە ناوچەی ململانێکە(کورد وەک قەوارە و خاک و خەڵک نەک دەسەڵات)
#دواجار یەکێك لەو ناوچانەی لە ڕۆژهەڵاتی ناوەڕاستدا لەسەر مێزی گفتووگۆکانی وڵاتانی زلهێز و دەوروبەر دانوستانی پێوە دەکرێت هەرێمی کوردستانە، بەبێ ئەوەی هەرێم خۆی لەسەر ئەو مێزە حزووری هەبێ، بۆیە پێویستە کورد وریاتر و وردتر هەنگاو هەڵگرێت.
هێشتا بەیانیەکی زووە و دنیا تەمە، کات ماوە بۆ ئەوەی خوێندنەوەی ورد و ڕوون بۆ دۆخەکە بکرێت.

نووسەر: عوسمان گوڵپی